बैतडी- बैतडीको प्रसिद्ध निङ्गलाशैनी भगवती मन्दिरमा बलिसहितको जात्रा सम्पन्न भएको छ । जिल्लाको दशरथचन्द नगरपालिका वडा नं २ देहिमाण्डौँ स्थित प्रसिद्ध निङ्गलाशैनी भगवती मन्दिरमा हरेक बर्ष चैत्राष्टमीमा लाग्ने बलि सहितको जात्रा आज सम्पन्न भएको हो ।
चैत्राष्टमीको अवसरमा निङ्गलाशैनी भगवती मन्दिरमा लागेको जात्रामा सयौँ रांगा बोकाको बलि दिइएको छ । आज भएको जात्रामा सयौँ रांगा बोकाको बलि गरिएको निङ्गलाशैनी भगवती धार्मिक सेवा समितिले जनाएको छ । २ सय बोका र २ सय राँगाको बलि दिइएको मन्दिरका मुखिया मानबहादुर बोहराले बताए ।
निङ्गलाशैनी भगवती मन्दिरको चैत्राष्टमीको जात्रा शान्तपूर्ण रुपमा सम्पन्न भएको उनको भनाई छ । निङ्गलाशैनी मन्दिरमा हरेक बर्ष असोजको महाष्टमी र चैत्राष्टमीमा सो मन्दिरमा बलि सहित जात्रा हुने गरेको छ । यो मन्दिरमा दर्शनका लागि नेपालका मात्रै नभएर सीमावर्ती भारतीय दर्शनार्थी समेत पुग्ने गरेका छन् ।
