बैतडी –आसन्न स्थानीय तहको निर्वाचनका लागि नेकपा एमालले उम्मेद्वार छनौटमा तीव्रता दिएको छ । जिल्लाको दशरथचन्द नगरपालिकाका ११ वडा मध्ये ५ ओटा वडामा उम्मेद्वारको टुंगो लगाइएको एमाले नगर कमिटि सचिव मनोज बोहराले बताए ।
दशरथचन्द नगरपालिका वडा नं १ मा विष्णुदत्त भट्टलाई वडा अध्यक्षको उम्मेद्वार बनाइएको छ भने वडा नं २ मा सूर्य बोहरालाई वडा अध्यक्षको उम्मेद्वार बनाइएको छ । यसैगरी वडा नं ३ मा अजब पाण्डे, वडा नं ६ मा धनसिंह ठगुन्ना र वडा नं ७ मा हरिदत्त बडुलाई वडा अध्यक्षको उम्मेद्वार बनाइएको सचिव बोहराले बताए । उम्मेद्वारको टुंगो लागेका सबै वडामा सर्वसम्मत उम्मेद्वार छनौट गरिएको एमालेले जनाएको छ ।
बाँकी वडाहरुमा दुईतीन दिनभित्रै उम्मेद्वारको टुंगो लाग्ने बताइएको छ । मेयर पदका लागि दशरथचन्द नगरपालिकामा एमालेले पुष्करराज जोशी (लाख्खाभाइ)लाई उम्मेद्वार बनाउने निर्णय गरेको छ । उपमेयर पदमा अझै उम्मेद्वारको टुंगो लागेको छैन् । उपमेयर पदका लागि पार्टीकी जिल्ला कमिटि उपसचिव सरस्वती नेपाली र राष्ट्रिय युवा संघकी सुदूरपश्चिम इन्चार्ज बिष्ना चन्द आकांक्षी देखिएका छन् ।
