कैलाली –कैलालीमा दुई जना मृत फेला परेका छन् । आइतबार जिल्लाको घोडाघोडी नगरपालिका वडा नम्बर १० पहलमानपुरस्थित तुल्सिपुर सामुदायिक वनमा उनीहरु मृत अवस्थामा भेटिएका हुन् । 

बझाङको जयपृथ्वी घर भएका २८ वर्षीय अमर जोशी र २४ वर्षीया अस्मिता सिंह मृत फेला परेका जिल्ला प्रहरी कार्यालयका कैलालीका प्रहरी नायब उपरीक्षक वेदप्रकाश जोशीले बताए । 

अमर दोस्रो विवाह गरेर गत चैतमा बझाङबाट कैलाली पुगेका थिए । प्रहरीका अनुसार उनले अस्मितासंग दोस्रो विवाह गरेका हुन् । अमर र अस्मिता केहीदिन घोडाघोडी नगरपालिका वडा नम्बर ५ मा आफ्ना आफन्तसंग बसेका थिए । 

चैत २६ गते घरबाट घुम्न जाने भनेर निस्किएका उनीहरु मृत अवस्थामा फेला परेका प्रहरीले जनाएको छ । घटनाको अनुसन्धान भईरहेको प्रहरीले जनाएको छ ।