बैतडी – रेडियो निङ्गलाशैनी ९४ मेगाहर्जले सञ्चालन गरेको सेल्फी स्कीम कार्यक्रममा बैतडीको दोगडाकेदार गाउँपालिकाका नन्दराज भट्ट (भगवान) विजेता भएका छन् । कार्यक्रम सवाल–जवाफमा सहभागी भएकाहरुले फोटो खिची फेसबुकमा पोष्ट गरेपछि उनीहरु मध्येबाट गोलाप्रथा गरेर एकजनालाई विजेता छानिएको हो ।
दोगडाकेदारको खोचलेकमा आयोजना भएको कार्यक्रममा छनौट भएका भट्टलाई नगद पुरस्कार सहित दोसल्ला र सम्मान पत्र प्रदान गरिएको छ । विजेता भट्टलाई रेडियो निङ्गलाशैनीका प्रबन्ध निर्देशक महेश अवस्थीले नगद पुरस्कार, दोसल्ला र सम्मान पत्र प्रदान गरे ।
रेडियो निङ्गलाशैनीले प्रदान गरेको सम्मानले आफू हर्षित भएको बताउँदै भट्टले चुनावका बेला रेडियोले सञ्चालन गरेको कार्यक्रमको प्रशंसा गरे । कार्यक्रम सवाल–जवाफमा सहभागी भएकाहरुलाई सम्मानित गर्ने उद्देश्यले रेडियो निङ्गलाशैनीले सेल्फी स्कीम सञ्चालनमा ल्याएको हो । यो स्कीम अन्तर्गत सहभागीहरुले रेडियो निङ्गलाशैनीको ब्यानरसंग फोटो खिचेर फेसबुकमा पोष्ट गर्नुपर्ने छ । फेसबुकमा फोटो पोष्ट गर्नेहरु मध्येबाट गोलाप्रथा गरेर एकजनालाई विजेता घोषणा गर्ने गरिएको छ ।
