कैलाली –नेपाली कांग्रेस सुदूरपश्चिम प्रदेश सभापति वीरबहादुर बलायरले कांग्रेसबाट निर्वाचित जनप्रतिनिधिले भ्रष्टाचार गरे पार्टीले कारबाही गर्ने बताएका छन् ।
पार्टीबाट सुदूरपश्चिमका विभिन्न स्थानीय तहमा निर्वाचित नगर प्रमुख, उपप्रमुख,गाउँपालिका अध्यक्ष र उपाध्यक्षहरुका लागि आयोजना गरिएको बधाई तथा स्वागत कार्यक्रममा बोल्दै उनले यस्तो बताएका हुन् ।
पार्टीको टिकटबाट जनप्रतिनिधि भएको भन्दै राम्रो काम गरेमा पार्टीको नाम उच्च रहने र नराम्रो काम गरेमा पार्टीको बदनाम हुने भएकाले जनताको मन जित्ने हिसाबले काम गर्न उनले निर्देशन दिए ।
कांग्रेसबाट निर्वाचित जनप्रतिनिधिहरुले आर्थिक अनियमितता, गलत काम गरेको पाइएमा पार्टीले कारवाही गर्ने सभापति बलायरले बताए ।
कार्यक्रममा सुदूरपश्चिम प्रदेशमा कांग्रेसबाट जितेका स्थानीय तहको प्रमुख, उपप्रमुख तथा अध्यक्ष र उपाध्यक्षहरुको सहभागिता रहेको थियो ।
