कैलाली –जिल्ला समन्वय समिति कैलालीमा सत्ता गठबन्धनका उम्मेदवार विजयी भएका छन् । समितिको प्रमुखमा काँग्रेसका पदमबहादुर कलेल विजयी भएका हुन् । उनले १३ मत पाए भने उनका प्रतिस्पर्धी नागरिक उन्मुक्ति पार्टीका इन्द्र चौधरीले १२ मत पाए ।
उपप्रमुखमा माओवादी केन्द्रका खगराज भुसाल १३ मत पाएर विजयी भए । उनका प्रतिस्पर्धी एमालेका राजेन्द्र खनालले १२ मत पाए ।
कैलालीमा सत्ता गठबन्धनअन्तर्गत काँग्रेस, माओवादी र एकीकृत समाजवादीले जिससको चुनावमा तालमेल गरेका थिए । उनीहरुको मत १२ थियो । गठबन्धनका उम्मेदवारलाई धनगढीको मेयरमा स्वतन्त्र उम्मेदवार भएर विजयी भएका गोपाल हमालले पनि साथ दिएका छन् ।
यस्तै नागरिक उन्मुक्ति र एमालेबीच छुट्टै तालमेल भएको थियो । ती दुबै पार्टीसग पनि १२ मत थियो । भ्रष्टाचार मुद्दाका कारण माओवादी केन्द्रबाट निर्वाचित मोहन्याल गाउँपालिकाका अध्यक्ष देवीदत्त उपाध्यायले भने मतदान गर्न पाएनन् ।
यस्तै जिल्ला समन्वय समितिको सदस्यमा कांग्रेसबाट बिर्खबहादुर बुढा र तेजबहादुर चन्द, नेकपा एकीकृत समाजवादीबाट जानकी चौधरी र लोकेन्द्रबहादुर ताडी, माओवादीबाट दिलु कामी र नागरिक उन्मुक्ति पार्टीबाट सरिता भुल विजयी भएका छन् ।
