बैतडी –आगामी असोजमा हुने नवौँ राष्ट्रिय खेलकुद प्रतियोगिताका लागि बैतडीमा जिल्लास्तरीय छनोट भदौ १० देखि सुरु हुने भएको छ । प्रतियोगितामा सहभागी हुन चाहने इच्छुक आवेदन भरेका महिला र पुरुष खेलाडीको छनोट भदौ १० देखि भदौ १५ सम्म हुने बैतडी जिल्ला खेलकुद विकास समितिका प्रमुख तर्कराज जोशीले बताए ।
पहिलो दिन महिला र पुरुष टेबलटेनिस, बुद्धिचाल, पुरुष भारत्तोलन , महिला र पुरुष कराँते, महिला र पुरुष तेक्वान्दो छनोट सदरमुकाममा हुनेछ । दोस्रो दिन सदरमुकाममै पुरुष र महिला ब्याडमिन्टन, महिला र पुरुष्ष उस्सु फुल कन्टयाक्ट कराँतेको छनोट हुनेछ । यस्तै भदौ १२ गते मेलौली खेल मैदानमा महिला र पुरुष भलिबल छनोट हुने बैतडी जिल्ला खेलकुद विकास समितिले जनाएको छ ।
यस्तै भदौ १३ गते पाटन खेल मैदानमा महिला ÷पुरुष कबड्डी , महिला ÷पुरुष एथलेटिक्स, पुरुष फुटबल, पुरुष बक्सिङको छनोट हुनेछ । भदौ १४ गते देहिमाडौँ खेल मैदानमा पुरुष क्रिकेट र भदौ १५ गते सोही मैदानमा महिला क्रिकेट छनोट प्रतियोगिता सञ्चालन हुने जोशीले बताए ।
छनोट प्रतियोगितामा सहभागी हुनका लागि यहाँका ३२५ खेलाडीले आवेदन भरेका छन् । जिल्लाबाट छनोट भएका खेलाडीले प्रदेशस्तरीय छनोट प्रतियोगितामा सहभागी हुन पाउनेछन् । राष्ट्रिय खेलकुद परिषद्को आयोजनामा नवौँ राष्ट्रिय खेलकुद प्रतियोगिता आगामी असोज २८ देखि कात्तिक ३ गतेसम्म गण्डकी प्रदेशको पोखरामा हुने तय भएको छ ।
