दार्चुला – दार्चुलामा बाढीपहिरोमा परी ज्यान गुमाएका व्यक्तिका परिवारलाई जनही एक लाख रुपैयाँ दिइने भएको छ । सुदूरपश्चिम प्रदेशका आन्तरिक मामिला तथा कानुनमन्त्री डा.रणबहादुर रावलले प्रदेश सरकारका तर्फबाट मृतकका परिवारलाई जनही एक लाख रुपैयाँ दिने घोषणा गरेका हुन् ।
बाढीपहिरो प्रभावितका लागि राहत र उद्धार सामग्री लिएर मन्त्री रावलसहित उद्योग, वाणिज्य तथा आपूर्तिमन्त्री दिलेन्द्रप्रसाद बडू र सुदूरपश्चिमका वनमन्त्री मानबहादुर धामीसहितको टोली शनिबार दार्चुला पुगेको छ ।
दार्चुलामा सुरक्षा निकायका अधिकारीहरूसँगको छलफलमा मन्त्री रावलले मृतकका परिवारलाई जनही एक लाखका दरले राहत दिने घोषणा गरेका हुन् ।
बाढीपहिरोमा परी घाइते भएकाहरूलाई उपचारका लागि जनही ५० हजार रुपैयाँ सहयोग उपब्लध गराउने पनि मन्त्री रावलले जनाएका छन् ।
दार्चुलामा अविरल वर्षापछिको बाढीपहिरोमा परी अहिलेसम्म ५ जनाको मृत्यु भएको छ । त्यस्तै १० जना बेपत्ता र ८ जना घाइते भएका छन् ।
