बैतडी –जिल्ला सुरक्षा समितिको आयोजनामा घटस्थापनादेखि शुरु भएको ब्याडमिन्टन प्रतियोगिता आज सम्पन्न भएको छ । दशैं तथा तिहारको उपलक्ष्यमा आयोजना गरिएको प्रतियोगितामा १७ टीमका ३४ खेलाडीको सहभागिता रहेको थियो । 

जगन्नाथ ब्याडमिन्टन हलमा सम्पन्न प्रतियोगितामा महेशप्रसाद भट्ट र हरिश भण्डारीको टीम विजेता बनेको छ । विजेता टीमले नगद १५ हजार सहित मेडल र प्रमाण पत्र हात पारेको छ । 

यस्तै गंगादत्त पन्त र अंकित जोशीको टीम प्रतियोगितामा उपविजेता बनेको छ । उपविजेता टीमले नगद १० हजार सहित मेडल र प्रमाण पत्र हात पारेको छ । प्रतियोगितामा आनन्दसिंह थापा र बीरबहादुर खाती तथा दिनेश ठगुन्ना र प्रेम बोकटीको टीम तृतीय भएको छ । दुवै टीमले ५÷५ हजारका दरले नगद पुस्कारका साथै मेडल र प्रमाणपत्र प्राप्त गरेका छन् । 

यस्तै प्रतियोगितामा म्यान अफ दि म्याच हरिश भण्डारी भए भने उदयमान खेलाडी प्रवीण भट्ट भए । उनीहरुलाई प्रतिव्यक्ति २ हजार ५ सयका दरले पुरस्कार प्रदान गरिएको छ । 

यस्तै ६२ बर्षीय सरप ठगुन्ना र ६५ बर्षीय नरेश पौडेललाई भेट्रान खेलाडीको रुपमा सम्मान समेत गरिएको छ । 

ब्याडमिन्टन प्रतियोगितामा विजेता, उपविजेता लगायतका खेलाडीहरुलाई दशरथचन्द नगरपालिकाका प्रमुख पुष्कराराज जोशी र प्रमुख जिल्ला अधिकारी सुरेश पन्थीले पुरस्कार तथा प्रमाण पत्र प्रदान गरे । 

प्रतियोगिता सञ्चालनका लागि नागार्जुन निर्माण सेवाले बिशेष सहयोग गरेको बताइएको छ । जिल्लामा पहिलो पटक जिल्ला सुरक्षा समितिको अगुवाईमा ब्याडमिन्टन हल समेत निर्माण भएको छ । सोही हलमा प्रतियोगिता सञ्चालन गरिएको बताइएको छ ।