बैतडी –बैतडीको डिलाशैनी गाउँपालिकाले पालिकास्तरीय अध्यक्ष कप खुल्ला भलिबल प्रतियोगिता आयोजना गर्ने भएको छ । आगामी कार्तिक ३ गतेदेखि ६ गते सम्म डिलाशैनी ५ हरिनगर खेलमैदानमा प्रतियोगिता हुने डिलाशैनी गाउँपालिकाका प्रवक्ता यज्ञराज भट्टले बताए । 

प्रतियोगितामा भाग लिन चाहने समूह, क्लब, वडा सबैले कार्तिक २ गते दिउँसो १२ बजेसम्म टीम दर्ता गराइसक्नुपर्ने पालिकाले प्रकाशन गरेको सूचनामा उल्लेख गरिएको छ । टीम दर्ताका लागि ५ हजार शुल्क समेत तोकिएको प्रवक्ता भट्टले बताए । 

प्रतियोगितामा प्रथम हुने टीमलाई नगद ५० हजार सहित ट्रफि मेडल र प्रमाण पत्र दिइनेछ भने दोश्रो हुने टीमलाई नगद २५ हजार सहित ट्रफि, मेडल र प्रमाणपत्र दिइनेछ । यस्तै प्रतियोगितामा तृतीय हुने टीमलाई नगद १५ हजार सहित ट्रफि, मेडल र प्रमाण पत्र दिइने बताइएको छ । प्रतियोगितामा सर्वोत्कृष्ट खेलाडीलाई बिशेष पुरस्कारको व्यवस्था गरिएको पालिकाले प्रकाशन गरेको सूचनामा उल्लेख गरिएको छ ।