बैतडी –बैतडीमा निषेधाज्ञा पालनामा लापरवाही गरिएको पाइएको छ । विकास निर्माणका कामहरु गर्दा स्वास्थ्यका मापदण्ड अपनाएर गर्नुपर्ने भनिएपनि विभिन्न ठाउँमा स्वास्थ्यका मापदण्ड लत्याएको पाइएको हो ।
सुर्नया गाउँपालिका वडा नं २ को ग्वानीमा प्रधानमन्त्री रोजगार कार्यक्रम अन्तर्गत बाटो निर्माणको काम भईरहेको र सो ठाउँमा स्वास्थ्यका मापदण्ड नअपनाएरै काम भईरहेको स्थानीय विनोद बिष्टले जानकारी दिए ।
योजनाको बारेमा समेत आफूहरुलाई कुनै जानकारी नदिएको र जानकारी माग्न खोज्दा काम गर्नोस भन्ने गरेको उनले बताए । योजनामा काम गर्नेहरुले कुनै प्रकारको स्वास्थ्य सावधानी नअपनाएको बिष्टले बताए ।
एकै गाउँ र टोलका मानिस मिलेर काम गरिरहेकाले संगसंगै काम गरेको देखिएको हुन सक्ने स्थानीय मोहनबहादुर बिष्टले बताए । जिल्लामा कोरोना भाईरसको रोकथामका लागि निषेधाज्ञा जारी रहेको भएपनि विभिन्न ठाउँमा निषेधाज्ञा उल्लंघनका घटनाहरु भईरहेका छन् ।
