बैतडी–बैतडीमा कोरोना विरुद्धको कोभीशिल्ड खोप लगाएका जेष्ठ नागरिकलाई खोपको दोश्रो मात्रा दिने बिषयमा अझै पनि अन्योल रहेको छ । जिल्लामा देशभरी जस्तै ६५ बर्ष माथिका नागरिकलाई कोभीशिल्ड खोपको पहिला मात्रा लगाएको भएपनि दोश्रो मात्रा कहिले लगाउने भन्ने बिषयमा अनिश्चितता कायमै रहेको स्वास्थ्य कार्यालयका प्रमुख योगेशप्रसाद भट्टले जानकारी दिए ।
कोभीशिल्ड खोपको आयात नै नभएकाले कहिले दोश्रो मात्रा लगाउने भन्ने बिषयमा यकिन नभएको उनले बताए । बैतडीमा गत फागुन २३ देखि चैत २ गते सम्म जेष्ठ नागरिकलाई कोभीशिल्डको पहिलो मात्रा लगाइएको थियो ।
कोभीशिल्ड खोपको पहिलो मात्रा लगाएको १२ देखि १६ हप्ता भित्र दोश्रो मात्रा लगाई सक्नुपर्ने हुन्छ । बैतडीमा १२ हजार ९५३ जना जेष्ठ नागरिकले कोभीशिल्ड खोपको पहिलो मात्रा लगाएका स्वास्थ्य कार्यालयका खोप सुपरभाईजर निरीक्षक हरिश भट्टले जानकारी दिए । उनले भने ‘कोभीशील्डको दोश्रो मात्रा कहिले आउँछ भन्ने बिषयमा अहिले सम्म यकिन भएको छैन् । त्यसैले पहिलो मात्रा लगाएका जेष्ठ नागरिकलाई दोश्रो मात्रा कहिले लगाउने बिषयमा टुंगो छैन् ।’
दशरथचन्द नगरपालिकामा १ हजार ८१७ जना, पाटन नगरपालिकामा २ हजार ४१७ जना, मेलौली नगरपालिकामा ९०७ जना, पुर्चौडी नगरपालिकामा १ हजार ९६० जना र सिगास गाउँपालिकामा १ हजार ५० जना जेष्ठ नागरिकले खोपको पहिलो मात्रा लगाएका थिए ।
यस्तै सुर्नया गाउँपालिकामा ८ सय, दोगडाकेदार गाउँपालिकामा १ हजार ४६३ जना, डिलाशैनी गाउँपालिकामा १ हजार ८९, पञ्चेश्वर गाउँपालिकामा ८ सय जना र शिवनाथ गाउँपालिकामा ६ सय ५० जना जेष्ठ नागरिकले खोपको पहिलो मात्रा लगाएका छन् ।
अहिले खोपको पहिलो मात्रा लगाएका जेष्ठ नागरिक खोपको दोश्रो मात्राको पर्खाईमा रहेका छन् ।
