बैतडी – बैतडीमा भोलिदेखि जिल्लास्तरीय अन्तरपालिका भलिबल प्रतियोगिता हुने भएको छ । मैनेजर तेजबहादुर चन्द ट्रष्टको आयोजनामा मैनेजर तेजबहादुर चन्द स्मृति जिल्लास्तरीय अन्तरपालिका भलिबल प्रतियोगिता सञ्चालन हुने ट्रष्टका सचिव विनोदबहादुर चन्दले बताए । प्रतियोगिताको तयारी पूरा भइसकेको उनले बताए । 

प्रतियोगितामा दोगडाकेदार गाउँपालिका बाहेक ९ ओटा स्थानीय तह र एक आयोजकको गरी १० ओटा टीमको सहभागिता रहने चन्दले बताए । मैनेजर तेजबहादुर चन्दको घरबाट शहीद दशरथचन्द घर हुँदै प्रभातफेरीको आयोजना गरेर दशरथचन्द खेल मैदान सुन्दरखालीमा प्रतियोगिताको उद्दघाटन गरिने बताइएको छ । 

प्रतियोगितामा प्रथम हुने टीमलाई नगद १ लाख २५ हजार र ट्रफी, दोश्रो हुनेलाई नगद ७५ हजार र ट्रफी तथा तेश्रो हुनेलाई नगद ३५ हजार ट्रफी वितरण गरिने ट्रष्टले जनाएको छ । 

मंसिर २७ गते सम्म सञ्चालन हुने प्रतियोगिताका लागि १० लाख बढी खर्च हुने आयोजकले जनाएको छ । जिल्लामा भलिबल खेलाडीहरुको क्षमता अभिवृद्धिका लागि ट्रष्टले प्रत्येक बर्ष प्रतियोगिताको आयोजना गर्दै आएको छ । यो भन्दा पहिला दशरथचन्द नगरपालिकास्तरीय भलिबल प्रतियोगिता गर्दै आएको ट्रष्टले पहिलो पटक जिल्लास्तरीय भलिबल प्रतियोगिताको आयोजना गर्न लागेको हो । यसका साथै ट्रष्टले अन्य सामाजिक कार्य समेत गरिरहेको सचिव चन्दले बताए ।