बैतडी –शहीद दिवसको अवसरमा बैतडीको दशरथचन्द नगरपालिकाले महिला क्रिकेट प्रतियोगिताको आयोजना गर्ने भएको छ । नगर खेलकुद विकास समितिको आयोजनामा नगरस्तरीय महिला क्रिकेट महिला क्रिकेट प्रतियोगिता आयोजना गर्ने तयारी भएको हो ।  

माघ पहिलो हप्ताबाट शुरु हुने प्रतियोगिताका ११ वटै वडाको सहभागिता रहने नगर खेलकुद विकास समितिका अध्यक्ष भुपेन्द्र चन्दले जानकारी दिए । प्रतियोगितामा टोली सहभागिताका लागि सबै वडाहरुलाई जानकारी पठाइएको उनले बताए । प्रतियोगितामा सहभागी हुन इच्छुक खेलाडीहरुलाई सहज होस भनेर वडा कार्यालयहरुमा पत्र पठाइएको अध्यक्ष चन्दले बताए ।

प्रतियोगिताको पुरस्कार, मिति र खेल सञ्चालनको  स्थान केही दिनमा तोकिने चन्दको भनाई छ । खेलकुद क्षेत्रलाई प्राथमिकतामा राखेको दशरथचन्द नगरपालिकाले केहि दिन अगाडी ब्याडमिन्टन प्रतियोगिता सञ्चालन गरेको थियो ।  निकट भविष्यमै नगरस्तरीय पुरुष क्रिकेट, नगरस्तरीय महिला÷पुरुष भलिबल र राष्ट्रपति रनिङ शिल्ड गर्ने योजना रहेको जनाएको छ । 

केही दिन पहिला सम्पन्न भएको ब्याडमिन्टन प्रतियोगिताको उद्दघाटनमा समारोहमा बोल्दै नगर प्रमुख पुष्करराज जोशी (लख्खाभाइ)ले खेलकुदको विकास र खेलाडी उत्पादन,क्षमता अभिवृद्धिका लागि नगरपालिकाले पहल गर्ने बताएका थिए ।