कैलाली –लागु औषध सहित कैलालीमा प्रहरीले १२ जनालाई नियन्त्रणमा लिएको छ । वडा प्रहरी कार्यालय धनगढी र प्रहरी चौकी त्रिनगरबाट खटिएको संयुक्त टोलीले धनगढी उपमहानगरपालिका वडा नं २ र ३ को सिमानाबाट मंगलबार १२ जनालाई नियन्त्रणमा लिएको सुदूरपश्चिम प्रदेश प्रहरी कार्यालयले जनाएको छ । 

कैलालीको गौरीगंगा नगरपालिका वडा नं २ का ३३ बर्षीय हिक्मत साउँद सहित १२ जनाबाट खैरोहिरोइन सहितका लागु पदार्थ बरामद गरिएको प्रहरीले जनाएको छ । ६ ग्राम ४३० मिलिग्राम खैरोहेरोइन, १० ग्राम गाँजा, १९ क्याप्सुल स्पासमो प्रोक्सिमन, १ ट्याबलेट नाइट्राभेट, १ सिसि कोरेस, २३ क्यापसुल स्पाससहित उनीहरुलाई नियन्त्रणमा लिइएको प्रहरीले जनाएको छ । 

पक्राउ परेकाहरुमाथि जिल्ला प्रहरी कार्यालय कैलालीले थप अनुसन्धान गरिरहेको छ । यस्तै लागु पदार्थ खैरोहेरोइन सहित कञ्चनपुरमा पनि एकजना पक्राउ परेका छन् । कञ्चनपुरको बेलौरी नगरपालिका ६ विद्यानगर बस्ने २१ बर्षीय आकाश बोहरालाई नियन्त्रणमा लिइएको प्रहरीले जनाएको छ । 

बेलौरीदेखि हात्तिबोझ तर्फ से. ७ व १४३९ नम्बरको मोटरसाइकलमा जाँदै गरेका बोहरालाई शंका लागि चेकजाँच गर्दा उनीसंग ०.१५ मिलिग्राम खैरोहेरोइन फेला परेको प्रहरीले जनाएको छ । बोहरा र उनी सवार मोटरसाइकल समेत नियन्त्रण लिएर अनुसन्धा भइरहेको प्रहरीले जनाएको छ ।