कैलाली – भारतबाट फर्किएका कैलालीका युवक धनगढीको एक होटलमा मृत फेला परेका छन् । बिहीबार बिहान भारतबाट फर्केका मोहन्याल गाउँपालिका–१ का ३९ वर्षीय प्रकाश घर्तीमगर धनगढी बसपार्कस्थित चन्द्रदीप मिलन बोगटान होटलमा मृत भेटिएका हुन् ।

प्रकाश होटलको शौचालयमा झुण्डिएको अवस्थामा मृत भेटिएका जिल्ला प्रहरी कार्यालय कैलालीका प्रवक्ता प्रहरी नायव उपरीक्षक वेदप्रकाश जोशीले बताए । भारतको रत्नागिरिबाट उनी बिहान ९ बजे होटलमा पुगेका थिए ।

शौचालयबाट धेरै बेरसम्म नफर्किएपछि उनीसँगै आएका बर्दगोरिया गाउँपालिका बौनियाका छत्रबहादुर चन्दले प्रहरीलाई खबर गरेका थिए । प्रकाश गत मंसिरमा कामको खोजीमा भारत गएका मृतककी श्रीमती गंगादेवी घर्तीमगरले बताइन् ।