बैतडी –बीमा भरेमा अनुदान दिन्छु भन्दै ठगी गर्ने बैतडीका एकजना विरुद्ध प्रहरीमा मुद्दा दर्ता भएको छ । इलाका प्रहरी कार्यालयले पाटनले बैतडीको पाटन नगरपालिका वडा नं २ सिलंगाका ३४ बर्षीय कमलराम विक विरुद्ध मुद्दा दर्ता गरेको हो ।
बीमा भर्ने भन्दै ठगी गरेको पाइएपछि प्रहरीले विकलाई बुधबार नियन्त्रणमा लिएको थियो । जिल्ला अदालतबाट सात दिनको म्याद थप गरेर विकमाथि अनुसन्धान शुरु भएको इलाका प्रहरी कार्यालयका प्रमुख प्रहरी निरीक्षक राजेश शाहीले जानकारी दिए ।
विकले सिटिजन लाइफ इन्स्योरेन्समा बीमा भरिदिन्छु भन्दै स्थानीयहरुबाट रकम संकलन गरेर ठगि गरेको पाइएको छ । महेन्द्रनगरबाट २५ लाख र बैतडीबाट १८ लाख रकम संकलन गरेर स्थानीयहरुलाई विकले ठगेको प्रहरी निरीक्षक शाहीले बताए ।
स्थानीयहरुले इलाका प्रहरी कार्यालयमा जाहेरी दिएपछि विकलाई नियन्त्रणमा लिइएको थियो । कमलराम विकसंगै दुईजना अरु पनि ठगी कार्यमा संलग्न रहेको बुझिएको र खोजी कार्य जारी रहेको प्रहरीले जनाएको छ ।
