बैतडी- बैतडीमा पिकनिक मनाउन गएका युवा जीवन बुडालको मृत्यु भएपछि परिवारले १२ जनाका नाममा किटानी जाहेरी दिएको छ । जाहेरीपछि पिकनिक मनाउन गएका १२ जनालाई प्रहरीले पक्राउ गरेको छ ।
सोमबार मृतकी श्रीमति मनिशा कुलुङ बुडालले घटना संकास्पद रहेको भन्दै जिल्ला प्रहरी कार्यालय बैतडीमा किटानी जाहेरी दिएको होे । पिकनिक खान गएका ११ जना र गाडी चालकसहित १२ जनामाथि अनुसन्धानका लागि किटानी जाहेरी दिएको मृतकका दाजु गोविन्द बुडालले बताए ।
ज्यान समन्धी कसुरमा परिवारले जाहेरी दिएपछि पिकनिक खान गएका १२ जनालाई नियन्त्रणमा लिएको जिल्ला प्रहरी कार्यालय बैतडीका प्रमुख प्रेमबहादुर शाहीले बताए ।
शवको पोष्र्टमार्टम रिपोर्ट अनुसार घटनाको अनुुसन्धान अघि बढ्ने जिल्ला प्रहरी कार्यालय बैतडीले जानकारी दिएको छ ।
राष्ट्रिय अनुसन्धान बझाङमा कार्यरत रहेका मृतक जीवन बुडाल विदामा घर आएका बेला शनिबार आफ्नो घर दशरथचन्द नगरपालिका–१० खडेनीबाट पिकनिक मनाउने भन्दै ११ जना साथीसँग म १ ज २२२ नं.को जिपमा दशरथचन्द नगरपालिका–६, शेरा गाएका थिए । पिकनिक मनाउन गाएका बुडाल शनिबार राति मृत अवस्थामा फेला परेका थिए ।
