बैतडीको सुर्नया गाउँपालिकाले सुत्केरी आमाहरुलाई उपाध्यक्षको कोसेली दिन थालेको छ । हजार दिने आमा र बच्चाको स्वास्थ्य र पोषणमा सुधार ल्याउनका लागि उपाध्यक्ष कोसेली वितरण कार्यक्रम शुरु गरिएको गाउँपालिका उपाध्यक्ष लीला बिष्टले जानकारी दिइन् ।

उनले भनिन् ‘हामीले हजार दिने आमा र बच्चाको स्वास्थ्य र पोषणमा सुधार ल्याउनका लागि यो कार्यक्रम सञ्चालन गरेका हौं । यसले घरपरिवारलाई पनि सुत्केरी आमाहरुको स्वास्थ्यको बिषयमा ध्यान दिनुपर्छ भन्ने सन्देश जान्छ ।’

गत विगतका बर्षहरु जस्तै यो बर्ष पनि सुत्केरी आमाहरुलाई उपाध्यक्षको कोसेली वितरण गर्न थालिएको उनले बताइन् । पालिकाका ८ ओटै वडामा रहेका सुत्केरी आमाहरुलाई कोसेली वितरणको काम भईरहेको हो । 

कोसेलीमा चना, सरसफाईका सामग्री, बर्खे तरकारीको बीउ, सेनेटरी प्याड र एउटा झोला दिने गरिएको छ । नेपाल सरकारको प्रोटोकल अनुसार ४ पटक गर्भजाँच गराएको, स्वास्थ्य संस्थामै सुत्केरी भएको आमाहरुलाई कोसेली दिने गरिएको सुर्नया गाउँपालिकाका स्वास्थ्य शाखा प्रमुख रामसिंह महराले जानकारी दिए । संस्थागत सुत्केरीको संख्या बढाउन पनि यो कार्यक्रमले सहयोग गर्ने महराले जानकारी दिए ।