डडेल्धुरा-परशुराम नगरपालिका–९ को सामुदायिक वनमा एक युवतीको शव फेला परेको छ । परशुराम–८ जमरानी आधारभूत स्वास्थ्य केन्द्रमा कार्यरत कार्यालय सहयोगी २६ वर्षीया अस्मितादेवी धामी शव फेला परेको हो ।
गत असार २ गते आधारभूत स्वास्थ्य केन्द्र जमरानीबाट स्वास्थ्य सामाग्री जोगबुडा अस्पताल पु¥याउन भनी निस्केकी अस्मिताको शव परशुराम नगरपालिका ९ को हट्वानी सामुदायिक वनमा शनिबार फेला परेको हो ।
घरपरिवार तथा स्थानीयले खोजी गर्दा अस्मिताको शव फेला परेको जिल्ला प्रहरी कार्यालय डडेल्धुराका सूचना अधिकारी प्रहरी निरीक्षक राजेन्द्रबहादुर चन्दले जानकारी दिए । प्रहरी घटनास्थलमा पुगिसकेको उनले बताए ।
धामीको हत्या भएको हुन सक्ने आशंका गरिएको छ । तर, प्रहरीले भने पोष्टमार्टमपछि मात्रै हत्या वा अन्य कारणले मृत्यु भएको हो भन्ने कुरा खुल्ने जनाएको छ ।
जिल्ला प्रहरी कार्यालयबाट घटनाको थप अनुसन्धानका लागि प्रहरी निरीक्षक हर्ष चन्दको नेतृत्वमा प्रहरी टोली पनि पठाइएको छ ।
