कैलाली –बझाङमा सुदूरपश्चिमका आन्तरिक मामिला तथा कानुनमन्त्री सवार गाडी दुर्घटना बिषयमा सत्यतथ्य पत्ता लगाउन छानबीन समिति गठन गरिएको छ । सुदूरपश्चिम सरकारले आज (बिहीबार) को मन्त्रीपरिषद बैठकबाट दुर्घटनाको छानबिनका लागि ७ सदस्यीय समिति गठन गरिएको हो ।
समितिले घटनाको सम्बन्धमा अनुसन्धान गरी पन्ध्र दिनभित्र प्रदेश सरकारमा प्रतिवेदन पेश गर्ने छ । मुख्यमन्त्री तथा मन्त्रिपरिषद्को कार्यालयका प्रदेश सचिव (कानुन) गंगाबहादुर खरेलको अध्यक्षतामा छानबिन समिति गठन गरिएको हो ।
असार ५ गते सुदुरपश्चिमका आन्तरिक मामिला तथा कानुन मन्त्री सिंहको गाडी दुर्घटनामा परी निधन भएको थियो । उनीसँगै उनकी पत्नी अमृता सिंह र मन्त्रीकी भाउजु जयादेवी सिंहको घटना स्थलमै मृत्यु भएको थियो ।
गाडीमा सवार मन्त्रीको सुरक्षार्थ खटिएका प्रहरी सहायक हवल्दार दिपक भण्डारी र गाडी चालक धर्मराज जोशी घाइते भएका छन् । उनीहरुको नेपालगञ्जमा उपचार भइरहेको छ ।
सुपप्र ०१००१ झ ४८० नम्बरको गाडीमा डडेल्धुराबाट चैनपुर जाने क्रममा केदारस्युँ गाउँपालिकाको धारछडा भन्ने ठाउँमा भएको दुर्घटनामा मन्त्री सिंहको निधन भएको हो ।
मन्त्री सिंह सवार गाडी सडकबाट अन्दाजी २५ मिटर तल कालंगा खोला किनारमा खसेको थियो । दुर्घटनाको कारण भने खुलेको छैन ।
