कैलाली –कैलालीको पहलमानपुरमा बस र ट्रक एक आपसमा ठोक्किएका छन् । बस र ट्रक एक आपसमा ठोक्किँदा १५ जना यात्रु घाइते भएका छन् । 

जिल्लाको घोडाघोडी नगरपालिका–१० घुम्तिभाकल स्थित पूर्वपश्चिम राजमार्गमा बस र ट्रक शनिबार दिउँसो सवा २ बजेतिर एक आपसमा ठोक्किएर दुर्घटना भएको प्रहरीले जनाएको छ । पुर्वबाट पश्चिमतर्फ आउँदै गरेको सुदूरपश्चिम प्रदेश ०१–००१ख२७५९ नम्बरको ट्रक र पश्चिमबाट पुर्व तर्फ जाँदै गरेको म १ ख ९०९ नम्बरको बस एक–आपसमा ठोक्किदा बस र ट्रकमा सवार यात्रु घाइते भएका  जिल्ला प्रहरी कार्यालय कैलालीका प्रहरी निरीक्षक खगेन्द्र साउँदले बताए ।

घाइते सबैको घोडाघोडी अस्पताल सुखडमा उपचारका लागि पठाइसकिएको उनले बताए । घाइतेहरुको उद्धार उपचारका लागि प्रहरी चौकी पहलमानपुरबाट पाँच जना र ईलाका प्रहरी कार्यालय सुखडबाट प्रहरी नायब उपरीक्षक बिरेन्द्रबिर बिश्वकर्माको कमाण्डमा १० जना प्रहरी टोली खटिएको छ । घाईतेहरुको पूर्ण विवरण आउन बाँकी छ । 

ट्रक सडकमा पल्टिएकाले अवरुद्ध राजमार्ग खुलाउने पहल भइरहेको प्रहरीले जनाएको छ ।