डडेल्धुरा –कोरोना संक्रमण नियन्त्रणका लागि डडेल्धुरामा जारी भएको निषेधाज्ञा खुकुलो पार्दै थप १० दिनका लागि थपिएको छ । प्रमुख जिल्ला अधिकारी हरिप्रसाद घिमिरेको अध्यक्षतामा बसेको जिल्ला कोभिड–१९ संकट व्यवस्थापन समितिको बैठकले असार २५ गतेसम्म निषेधाज्ञा लम्ब्याउने निर्णय गरेको हो ।
थप खुकुलो पार्दै असार १५ देखि २५ गतेसम्म निषेधाज्ञालाई निरन्तरता दिइएको प्रमुख जिल्ला अधिकारी घिमिरेले जानकारी दिए । अत्यावश्यक सेवा बाहेकका अन्य सार्वजनिक सेवा हाललाई बन्द गरिने उनले बताए ।
निषेधाज्ञाको समयमा सबै सवारी साधन जिल्लाभित्र जोर विजोर प्रणालीमा चल्ने र बाहिर जाँदा अनुमति लिनु पर्ने प्रशासनले जनाएको छ । अत्यावश्यक सवारी साधन भने सञ्चालन गर्न दिइनेछ ।
खाद्य सामग्रीका पसलहरू, तरकारी, दुग्घजन्य तथा मासु पसल र स्टेशनरी पसलहरू प्रत्येक दिन बिहान ७ बजेदेखि साँझ ७ बजेसम्म खुला गर्ने निर्णय गरिएको प्रमुख जिल्ला अधिकारी घिमिरेले जानकारी दिए । यस्तै अब बैंक तथा वित्तीय संस्थाहरू बिहान १० बजेदेखि साँझ ५ बजेसम्म सञ्चालन हुनेछन् ।
