कैलाली –कैलालीकी मञ्जु रावल हत्या प्रकरणमा संलग्न ४ जना पक्राउ परेका छन् । पक्राउ पर्नेमा कैलालीको लम्कीचुहा नगरपालिका वडा नम्बर–४ भल्का बस्ने ४० वर्षीया गोमा रावल, बर्षा रावल, २४ वर्षीय भरत रावल, अछामको पञ्चदेवल विनायक नगरपालिका–६ तोलि बस्ने ३७ वर्षीया सरिता रावललाई प्रहरीले पक्राउ गरेको छ ।
मृतक मञ्जुका छोरा बिवेक रावलले जेठ १ गते आमाको खोजतलासिका लागि ईलाका प्रहरी कार्यालय लम्कीमा निवेदन दिएका थिए । मृतक मञ्जु रावल र गोमा रावल बिच अंशको बिषयलाई लिएर बिबाद रहेको प्रहरी अनुसन्धानबाट खुलेको छ । जग्गाको बिषयलाई लिएर मञ्जु रावलको हत्या गर्ने योजना बनाईएको उनीहरुले प्रहरीलाइ बयान दिएका छन् ।
प्रतिबादी सरिता रावलको वयान र उनले देखाएको स्थान कैलालीको मोहन्याल गाउँपालिका–५ स्थित बाँसघारी सामुदायिक वनको सेतीखोर खोलाबाट अन्दाजी २०० मिटर पश्चिमतर्फ खोल्सामा ढुङ्गा मुनी च्यापेर राखेको अवस्थामा मञ्जुको शव आइतवार फेला परेको थियो ।
लम्की चुहा नगरपालिका–४ भल्काकी ३३ वर्षीया मन्जु रावल जेठ २५ गते वकिललाई भेट्न मसुरीया जान्छु भनि घरबाट गएको र सोही दिनको साँझदेखि बेपत्ता थिइन् । पक्राउ परेका चारै जनामाथि थप अनुसन्धान र कानुनी कारबाही भईरहेको जिल्ला प्रहरी कार्यालय कैलालीले जनाएको छ ।
