मधेस प्रदेशमा मन्त्रिपरिषद् पुनर्गठन, २ मन्त्रीद्वारा शपथ ग्रहण
काठमाण्डौ – मधेस प्रदेशका मुख्यमन्त्री सरोजकुमार यादवले मन्त्रिपरिषद् पुनर्गठन गरेका छन् । प्रदेशका विनाविभागीय मन्त्री वसन्त कुशवाहा र विनाविभागीय राज्यमन्त्री सञ्जयकुमार यादवले पदबाट राजीनामा दिएपछि मुख्यमन्त्रीले आज सोमवार पाँचौँ पटक मन्त्रिपरिषद् पुनर्गठन गरेका हुन् ।
प्रदेशको गृह सञ्चार तथा कानुन मन्त्रीमा नेपाली कांग्रेसका मोहमद समिम र श्रम तथा यातायात मन्त्रीमा जनमत पार्टीका चन्दन सिंह नियुक्त भएका छन् । नवनियुक्त मन्त्रीलाई प्रदेश प्रमुख हरिशंकर मिश्रले आजै पद तथा गोपनीयताको शपथ गराएका छन् ।
योसँगै मन्त्रिपरिषद्ले पूर्णता पाएको छ । जसपाबाट विनाविभागीय मन्त्री सुरिता साह यथावत् छिन् ।
प्रकाशित मिति: सोमबार, साउन १५, २०८० १९:५२
प्रतिक्रिया दिनुहोस्
