बैतडी –यो बर्ष सुदूरपश्चिममा दुई गौरा हुने निश्चित भएको छ । नेपाल पञ्चाङ्ग निर्णायक समितिले भदौ ७ गते गौराको तिथी तय गरेपछि यो तिथीमा कतिपय ज्योतिषहरुले असन्ुष्टी जनाएका छन् ।
गौरा पर्व भदौ शुक्ल वा कृष्ण पक्षमा मात्रै मनाइने भएकाले यो बर्षको गौराको उपयुक्त तिथी भदौ २१ नै रहेको ज्योतिष लक्ष्मीदत्त अवस्थीले बताए । गौरा एकादशी तथा जनैपूर्णिमा अघि दुबधागो धारण गर्ने परम्परा नरहेकाले भदौ २१ गते गौराष्टमी भएको उनले बताए ।
यो बर्ष अगस्ती उदयको दोष भएकाले भदौ ७ गते नै गौरा पर्वको उपयुक्त तिथी भएको ज्योतिष डिल्लीप्रसाद जोशीले बताए । अगस्ती उदयपछि गौरा पूजन गर्न नहुने शास्त्रीय मान्यता रहेको उनले बताए ।
ज्योतिषहरुबीच गौराको तिथीका बिषयमा मतभेद भएपछि यो बर्ष दुई दिन गौरा हुने निश्चित भएको छ । भदौ ७ र भदौ २१ गते गौरा मनाउने विभिन्न ठाउँमा तयारी भएको छ ।
नेपाल सरकार र प्रदेश सरकारले भने भदौ ७ र ८ गते गौरा पर्वको बिदा दिएको छ । पञ्चाङ्ग निर्णायक समितिले भदौ ७ गते नै गौरा तिथी तोकेकाले यो बेला सरकारी बिदा दिइएको हो ।
बैतडीका केही स्थानमा भदौ ७ र केही स्थानमा भदौ २१ गते गौरा मनाउने तयारी रहेको छ । भदौ ७ गतेको गौराका लागि भदौ ४ गते बिरुडापञ्चमी, भदौ ५ गते नानी गौरा, भदौ ६ गते अमुक्ताभरण सप्तमी र भदौ ७ गते गौराष्टमी राखिएको छ ।
भदौ २१ गते गौरा मनाइने स्थानमा भदौ १८ गते बिरुडापञ्चमी, भदौ १९ गते नानी गौरा, भदौ २० गते अमुक्ताभरण सप्तमी र भदौ २१ गते गौराष्टमी राखिएको छ ।
बैतडीमा निङ्गलाशैनी भगवतीको क्षेत्रमा भदौ ७ गते गौराको तयारी छ भने त्रिपुरासुन्दरी भगवतीको क्षेत्रमा भदौ २१ गते गौरा मनाउने तयारी छ ।
यस्तै दार्चुलाका केही ठाउँमा भदौ ७ र केही ठाउँमा भदौ २१ गते गौरा मनाउने तयारी छ । यस्तै डडेल्धुराका पनि केही ठाउँमा भदौ ७ र केही ठाउँमा भदौ २१ गते गौरा मनाउने तयारी गरिएको छ ।
