बैतडी –बैतडीको पाटनमा युवाहरुले सामूहिक रुपमा च्याउ खेती शुरु गरेका छन् । एक लाखको लगानीमा ६ युवाहरुले मिलेर पाटन बजार क्षेत्रमै च्याउ खेती शुरु गरेका हुन् ।
कृषि तथा भेट प्राविधिक अध्ययन गरेका युवाहरुले पाटनमा सामूहिक च्याउ खेती गरेका हुन् । जमीन भाडामा लिएर च्याउ फलाएको च्याउ खेतीमा संलग्न युवा अमरप्रसाद भट्टले बताए ।
फर्म नै दर्ता गरेर सामूहिक रुपमा च्याउ खेती गरिरहेका युवाहरुले अहिले प्रतिकेजी २८० देखि ३०० का दरले च्याउ विक्रि गरिरहेका छन् ।
स्वदेशमै केही गरौं भन्ने भावनाका साथ आफूहरुले सामूहिक रुपमा च्याउ खेती शुरु गरेको भट्टले बताए । उनले भने ‘अहिले हामी ६ जनाको समूह बनाएर च्याउ खेतीमा लागेका छौं । कृषिबाटै केही गर्न सकिन्छ भन्ने सन्देश दिन हामीले यो कार्य शुरु गरेका हौं ।’
अमरप्रसाद भट्ट, गौतमप्रसाद अवस्थी, निराजन पन्त, दिनेश भट्ट, भुवन भट्टराई र पुष्पा पन्त मिलेर सामूहकि च्याउ खेती गरिरहेका हुन् ।
कृषि पेशाबाटै आम्दानी गर्न सकिने भएकाले आफूहरु यसमा लागेको सामूहिक च्याउ खेतीमा लागेकी पुष्पा पन्तले बताइन् । अबका दिनमा यसलाई अझै विस्तार गर्ने आफूहरुको योजना रहेको उनले सुनाइन् ।
च्याउ खेतीमा पाटन नगरपालिकाले समेत सहयोग गर्नुपर्नेमा युवाहरुको जोड रहेको छ । कृषि क्षेत्रको बजेट दुरुपयोग हुने गरेको भन्दै भट्टले उद्यम गर्न चहाने युवाहरुलाई नगरपालिकाले सहयोग गर्नुपर्ने बताए ।
