बैतडी- बैतडीको पञ्चेश्वर कुलाउँमा देउडा प्रतियोगिता सम्पन्न भएको छ । द्वारिकादेवी चन्द ठकुरानी प्रतिष्ठान शाखा कुलाउँ पञ्चेश्वरको आयोजनामा पालिकाको वडा नं ३ कुलाउँमा देउडा प्रतियोगिता सम्पन्न भएको हो ।
वडाको आथिक सहयोगमा देउडा प्रतियोगिता गरिएको द्वारिकादेवी चन्द ठकुरानी प्रतिष्ठान शाखा कुलाउँका अध्यक्ष राकेश चन्दले जानकारी दिए । प्रतियोगितामा प्रथम हुनेलाई १२ हजार दोस्रोलाई ९ हजार तेस्रो स्थान हासिल गर्नेलाई ६ हजार र सन्तोनालाई तीन हजार प्रमाणपत्र दिइएको उनले बताए ।
देउडा प्रतियोगितामा पञ्चेश्वर ३ कै स्थानीय बलबीर सिंह जोशी प्रथम भएका छन् । यस्तै मेलौली नगरपालिकाका श्याम बाग दोस्रोभएका हुन भने पञ्चेश्वर ३ का प्रेमसिंह साउँद तेस्रो र सन्तोना पञ्चेश्वर ४ की जैमती चन्द भएका प्रतिष्ठान शाखा अध्यक्ष चन्दले बताए । देउडा खेल लगायत स्थानीय कला संस्कृति जोगाउने उदेशयले आयोजना गरएको प्रतियोगितामा द्वारिकादेवीको सघर्ष र उनको योगदानमा आधारीत देउडा पस्केका थिए ।
देउडा कार्यक्रमको समापन सत्रमा बोल्दै पञ्चेश्वर गाउँपालिका उपाध्यक्ष बिना भट्टले द्वारिकादेवीको बारेमा नयाँ पुस्ताले जानकारी पाउने भएकाले अगामीदिनमा पनि यस्ता कार्यक्रम आयोजना गर्न सहयोग गर्ने बताइन् । द्वारिकादेवी चन्द ठकुरानी नेपालकी पहिली महिला सांसद हुन् । उनले १९९२ सालमा बैतडी तल्लो स्वराडका उद्धव बहादुर चन्द ठकुरीसंग बिवाह गरेका थिए । नेपाली कांग्रेसले २०१५ सालको आमचुनावमा क्षेत्र नं. ६६ डडेल्धुराबाट द्वारिकादेवी ठकुरानीलाई उम्मेदवार बनाएको थियो । २०१५ सालमा प्रतिनिधिसभा चुनावमा १०९ निर्वाचन क्षेत्र निर्धारण गरिएको थियो ।
ठकुरानीले ३,९०३ मत ल्याएर विजयी भएकी हुन् । उनले निर्वाचन क्षेत्र नं. ६६ डडेल्धुरा जिल्लामा पूर्वप्रधानमन्त्री डा. केआई सिंह नेतृत्वको संयुक्त प्रजातन्त्र पार्टीका उम्मेदवार लक्ष्मीदत्त भट्टलाई पराजित गरेकी थिइन् । ठकुरानी १३ जेठ ०१६ मा विश्वेश्वरप्रसाद कोइरालाको प्रधानमन्त्रीत्वमा गठित मन्त्रिमण्डलमा स्वास्थ्य तथा स्वायत्त शासन उपमन्त्रीमा भइन् । १६ असार ०१६ मा मन्त्रीमण्डल पुनर्गठन हुँदा स्वास्थ्य तथा स्थानीय स्वायत्त शासन सहायकमन्त्री बनिन् । नेपालको मन्त्रीमण्डलमा समावेश हुने ठकुरानी पहिलो महिलामन्त्री हुन् ।
बीपी कोइरालाको मन्त्रीमण्डलमा द्वारिकादेवी र उनका भाइ शिवराज पन्त खाद्य, कृषि र वनमन्त्री बनेका थिए । एउटै बुबाका दुई छोराछोरी मन्त्री हुनेमा ठकुरानी र पन्त पर्छन् । द्वारिकादेवी चन्द ठकुरानीको जन्म १९७४ कार्तिक १२ गते डोटीमा भएको थियो भने मृत्यु २०५९ साल मंसिर २४ गते कैलालीको जोगेडामा भएको थियो ।
